LC 2014 10月開倉大作戰

一直以來都好鍾意LC嘅stoneware，但可惜LC 嘅產品係天價，所以一直都唔捨得買。不過呢個貴族品牌每年都會舉行兩次VIP開倉大減價，每次都會吸引好多jm、靚太、靚媽去搶購。唔係講笑，真係打仗咁，要一眼關七，手起刀落，反應慢啲真係會乜都無架!

上次開倉係今年4月，那次彩虹都係首次收到email invitation，但可惜小CEO剛剛出世無耐，所以唔方便去。但今次，彩虹居然收到invitation card!

無錯，係卡，唔係email, 可以無限次進場添! 所以今次，彩虹真係忍唔到喇!

彩虹問准咗CFO，5/10攞正牌可以放低大小CEO，出走去shopping，嘻嘻～

LC今次開倉喺銅鑼灣富豪酒店舉行，碰巧那度附近有佔領活動，好多人都驚銅鑼灣會危險，所以少咗好多人。

彩虹大約2點50分去到酒店附近攞籌排隊。

等咗20分鐘度就被安排入酒店地庫第一間房度等。涼住冷氣，又上下網咁等，時間真係過得好快~ 3點40分就check invitation card同交按金租購物袋，之後就去第二間房度等。無錯，等完一間房仲有另一間，“守衛森嚴”，好緊張呀！

最後，4點20分度終於入到場喇，限時45分鐘。而彩虹好好彩，算係呢場嘅前50個。一入到去，場面好壯觀，好多橙色牆，好有氣勢呀！頓時真係心心眼出哂嚟~ Sorry, 彩虹真係大鄉里，未見過咁多LC一次過放喺度架。

當時嘅我真係傻咗，居然仲慢慢行去啲貨架度睇。轉眼間，開倉場地已經變成戰場，個個原本儀態萬千、嬌嫡嫡嘅女士，忽然全部super woman上身，大手大手咁將LC產品放入手上那個橙色大袋。唔係講笑，用過LC嘅人都應該知道，佢啲煲同石頭真係幾十斤重，少啲力都攞唔起架!

不過好彩佢地爭崩頭嘅心心花花，我通通都唔啱，所以喺無乜人同我爭嘅情況下，都能夠順利買到了彩虹嘅心頭好,呵呵～

揀完就即刻俾錢鬆人，離開果陣大約4點45分度，全程只係用咗2個鐘。最開心係CFO居然嚟接我走，實在太感動喇~ 今次絕對係happy shopping呀，Yeah!

返到屋企，梗係第一時間欣賞下啲戰利品啦~
登~登~登~登! 呢啲就係彩虹首次去LC開倉嘅戰利品喇~

係咪好靚呢？其實彩虹係超鍾意紫色同藍色架，哈哈! 唯一遺憾嘅係買唔到個pepper mill, 搞到個salt mill好孤單啊～

閱讀全文

黃豆三兄弟 （韓式涼拌大豆芽、枝竹、豆卜）

呢幾款韓式前菜係阿姨o既拿手小食，每次大家族聚會，都係 must eat item 之一 ~

香濃的麻油、微辣的刺激，雪凍後配上熱辣辣的白飯，真係令人食唔停口!!
而呢個前菜的重點就係個汁，只要調較好個汁，你想放咩落去撈都得~

食譜:

材料		調味料 (A)
- 大豆芽	半斤	- 日式/ 韓式豉油	1 湯匙
- 枝竹	2-3 條	- 糖	1 茶匙
- 豆卜	半斤	- 鹽	半茶匙
		- 水	200 ml
		調味料 (B)
		- 日式/ 韓式豉油	2 湯匙
		- 麻油	2 湯匙
		- 魚露	1 湯匙
		- 韓式辣椒粉	1-2 湯匙
		- 糖	1 湯匙
		- 鹽	少許
		- 水	少許 (視乎情況加減)

做法
1. 先將枝竹浸軟瀝乾，並切成約一吋長。
2. 將調味料(A) 放入小煲內煮滾，然後加入(1)並以小火煮約10-15分鐘，增加枝竹的味道。 完成後取出放涼。
3. 將大豆芽去尾洗淨瀝乾，然後燒滾一煲水，水滾後放少許鹽及加入已洗淨的大豆芽，飛水約1-2分鐘，
    稍為焯軟即可。
4. 撈出已飛水的大豆芽，並放入冰水冷卻。冷卻後，撈出瀝乾。
5. 將已清洗並榨出水分的豆卜加入剛才飛水的煲內，以中火煮約5分鐘，然後取出放涼。放涼後，榨出豆卜內
    的水分。
6. 將調味料(B)放入一個大攪拌碗內拌勻成醬汁，然後加入大豆芽、枝竹及豆卜拌勻。
7. 將(6)放入已消毒並抹乾的玻璃器皿內，蓋好後放入雪櫃冷藏最少2小時至入味。

小貼士
1. 將大豆芽飛水，可袪除草腥味；雪凍後的大豆芽會變得更為爽脆。
2. 豆卜最好買長而扁身那種，會較易入味及做出來的賣相較好。
3. 先將已煮的豆卜內水分榨出，才放入醬汁內拌勻，可令豆卜吸取更多醬汁、更加入味。
4. 玻璃器皿需徹底消毒及抹乾，否則所存放的食物會較易變壞。
5. 若時間許可，做好了的涼拌放過夜才吃，會更好味；一般可於雪櫃內存放一星期。

閱讀全文